Thursday, April 12, 2012

என் விகடனில் வலைமனை




இந்த வார ஆனந்த விகடன் இணைப்பான என் விகடன் சென்னை பதிப்பு வலையோசையில் வலைமனை குறித்த அறிமுகம் கொடுத்திருக்கிறார்கள். சமீபத்தில் எழுதிய இரண்டு பதிவுகளுடன், எனது ட்வீட்ஸும் பிரசுரிக்கப்பட்டு இருக்கிறது. 


ரெண்டு பக்கம் விகடனில், அதுவும் பிறந்த ஊர், படித்த கல்லூரியின் அடையாளங்களுடன்.  தீபாவளி ராக்கெட்டின் திரியைக்கொளுத்தினாற் போல் மனது பறந்து கொண்டிருக்கிறது. இரண்டு ஆஸ்கார்களை வாங்கி கொண்டு ஏ.ஆர் எல்லாம் எப்படித்தான் கம்மென்று இருந்தாரோ... மேன் மக்கள் மேன்மக்களே...!



விதையில் ஒளிந்திருக்கும் செடியை தண்ணீரும், ஒளியும் மேலெழ செய்வது போல ஊக்கம் தந்து வலைமனையை உயிர்ப்போடு வைத்திருக்கும் இணையம் மற்றும் இணையம் சாராத அனைத்து நண்பர்களின் அன்பிற்கும் ஆதரவிற்கும் மற்றும் பதிவர்களை ஊக்கப்படுத்தும் விகடன் குழுமத்தாருக்கும் எனது மனமார்ந்த நன்றிகளை தெரிவித்துக்கொள்கிறேன்.  




Wednesday, April 11, 2012

நாக்கை கடித்த ஷேவாக் - வார்னிங் கொடுத்த தோனி | வலைமனை போட்டூன்ஸ்


அனைத்து கற்பனையே .. யார் மனதையும் புண்படுத்தும் நோக்கத்தில் எழுதப்பட்டது அல்ல..  (படங்கள் | நன்றி : பி.சி.சி. ஐ)










Thursday, April 5, 2012

ஐ.பி.எல் கொசுவர்த்தி | வலைமனை



2009ல் வலைமனையில் பதிவெழுத ஆரம்பித்த வேளையில் ஒன்றிரண்டு பதிவுகள் எழுதி போஸ்ட் செய்து நானே படித்து சந்தோஷப்பட்டுக் கொண்டிருப்பேன். இப்படியாய் பதிவுலக வாழ்க்கை நிம்மதியாய் போய்கொண்டிருந்த நிலையில் திடீரென ஒருநாள் நான் ஐ.பி.எல் போட்டோ கமெண்ட்ஸை போட, அது வரை ஹிட் மீட்டரில் சிங்கிள் டிஜிட் மட்டுமே பழகியிருந்த எனக்கு நூறு, ஆயிரங்கள் முதல்முறையாக பரிச்சயம் ஆனது. பின்னர் ஐ.பி.எல் சீசன்களில் அடிக்கடி போட்டோ கமெண்ட்ஸ் போட ஆரம்பித்தேன். மெயில்களில் போட்டோ கமெண்ட்ஸ் சுற்றி வருவது குறித்து பழக்கப்பட்ட நண்பர்கள் கூறும்பொழுதெல்லாம் உற்சாகமாக இருக்கும். இப்பொழுதும் கூட சில சமயம் பேஸ்புக்கில் ஏதோ ஒரு சங்கத்தில் நூற்றுக்கணக்கில் ஷேர் செய்யப்பட்டிருக்கும் வலைமனை போட்டோ கமெண்ட்டை பார்க்கும் பொழுது எனக்கே செம காமெடியாக இருக்கிறது. 

ம் ம்.. இதான் சிம்பிளான கொசுவர்த்தி பிளாஷ்பேக்.. இப்போ கடந்த வருடங்களில் நான் பதிவிட்ட ஐ.பி.எல் போட்டோ கமெண்ட்ஸ்களில் சிலவற்றை கொசுவர்த்தி சுற்றி காட்டப்போகிறேன். விரைவில் நடப்பு ஐ.பி.எல் போட்டோ கமெண்ட்ஸையும் எதிர்பார்க்கலாம். இணைய நண்பர்களின் ஆதரவிற்கும் அன்பிற்கும் என்றென்றும் எனது நன்றிகள்.































































































Wednesday, April 4, 2012

ஃபேஸ்புக் தோழியும் பொய் சொன்ன நண்பனும்





இது மாதிரி ஃபேஸ்புக் என்று ஒன்று வந்து தொலைக்கும் என்று முன்பே தெரிந்திருந்தால் பத்தாம் வகுப்பு டியூஷனில் உடன் படித்த தனலட்சுமி, கவிதாக்களின் அப்பா பெயரையும் கேட்டு தெரிந்து வைத்திருப்பேன்.  இப்போழுது தனலட்சுமி என தேடினால் ஆயிரக்கணக்கில் தனலட்சுமிகள் ஃபேஸ்புக்கில் லைன் கட்டுகிறார்கள். நாய்குட்டி பொம்மையும், குட்டி பெண் பாப்பா போட்டோக்களும் புரொஃபைல் பிக்சராய் வைக்கப்பட்டு அதன் பின் மறைந்திருக்கும்  தனலட்சுமிக்களில் நம் தனலட்சுமியை எப்படி கண்டுபிடிப்பது என நினைக்கும்பொழுது அழுகையே வந்துவிடுகிறது.


ஆனால், நாம்தான் இவ்வளவு ஃபீல் செய்கிறோம், இதே நேரம் அந்த தனலட்சுமி நம்மை சுத்தமாக மறந்த நிலையில் செரலாக்கை கரைத்து மெகா சீரியல் பார்த்துக்கொண்டே பாப்பாவின் வாய்க்கு பதிலாய் காதில் ஊட்டிக்கொண்டிருக்கும் என நினைக்கும்பொழுது வந்த அழுகை கூட நின்னுடுது.


---


தங்கமணி கிச்சனில் கிரைண்டருடன் சண்டை போட்டபடி மாவும் கையுமாக இருந்த சுபமாலை வேளையில், குழந்தையை மடியில் வைத்தபடியே இணையத்தை மேய்ந்துக்கொண்டிருந்தேன். "ம்மே" மட்டுமே சொல்லக்கூடிய, எவ்வளவு கேட்டாலும் அப்பாவோ, தாத்தாவோ இன்னபிற வார்த்தைகளோ வாயில் வராத பத்து மாத அப்பாவிக்குழந்தை. 


மேய்ச்சல் போக்கில் பேஸ்புக்கில் புதிதாய் ஆட் ஆன தோழியின் புரொபைலை கிளிக் செய்தேன். அவ்வளவுதான்... சரஸ்வதி சபதத்தில் அருள் வந்து திடீரென பேசும் சிவாஜி மாதிரி, அந்த தோழியின் புகைப்படத்தை பார்த்ததும் மடியில் இருந்த குழந்தை "க்கா... அக்கா" என ஹை டெசிபலில் அபாய ஒலியெழுப்ப,  கிச்சனில் இருந்து ஆச்சரியமாக தங்கமணி படாரென எட்டிப்பார்க்க, மடியில் குழந்தை அங்குமிங்கும் மீன் போல துடித்ததால் சட்டென விண்டோவை குளோஸ் செய்ய முடியாமல் எல்லாம் சுபமாய் முடிந்தது. 


இன்னும் நமக்கெதிராய் செயல்பட குழந்தைக்கு என்னென்ன பயிற்சிகள் தரப்படுகிறதோ என நினைத்தாலே கலக்கமாய் இருக்கிறது.
---


சமீபத்தில் திருமணமான உயிர் நண்பன், படத்துக்கு கூப்பிட்டாக் கூட ரொம்ப நல்லவன் மாதிரியே பேசுனான். இடையில இடையில அவன் மனைவியோட சிரிப்புக்குரல் வேற கேட்டுச்சு. ரொம்ப நல்லவன் மாதிரி சீன் போடுறானேனு, டவுட்டோட, 


"ஏன்டா ஸ்பீக்கர் போட்டு பேசுறியாடா?"னு கேட்டேன். 

"இல்லையே"ன்னான். 

"ம்.. சரி சரி..  அப்புறம் மச்சி.. பழைய ஃபிகர் சுப்ரபா கூட இன்னும் கான்டாக்ட் இருக்காடா?"ன்னு ஒருவார்த்தைதான் கேட்டேன்.

அப்ப கட் ஆன கால்தான். 

# பயபுள்ள பொய் சொல்லிட்டான் போலிருக்கு



Tuesday, March 20, 2012

வள்ளல்கள் கர்ணனும் இன்றைய புரட்சித்தலைவியும்



"உள்ளத்தில் நல்ல உள்ளம் உறங்காதென்பது..."  என டி.டி.எஸ் ஒலி பின்னணியில் பாடிக்கொண்டே வரும் என்.டி.ஆர்.. டிஜிட்டல் ரீஸ்டோரேஷன் முறையில் பூஸ்ட் அப் செய்யப்பட்ட காட்சியில் சரிந்து கிடக்கும் சிவாஜி.. சுமார் 40 வருட பழமை வாய்ந்த திரைக்காவியத்தை மெருகேற்றப்பட்ட நிலையில் திரையில் காணவும் ஒரு பாக்கியம் வேண்டும்.

என் அம்மா தீவிர சிவாஜி ரசிகை. அதிலும் கர்ணண் படம் குறித்து பல முறை சிலாகித்திருக்கிறார். கர்ணண் டிஜிட்டல் மேருகேற்றல் என்கிற விளம்பரம் பார்த்து கடந்த ஞாயிறு இரவுக்காட்சிக்கு ஏ.வி.எம் ராஜேஸ்வரி திரையரங்கிற்கு அழைத்து சென்றேன். படம் துவங்கிய சில நிமிடங்களுக்கெல்லாம் ஹவுஸ்புல்லாகி விட்டது.

படம் ஆரம்பிக்கும் முன்னர் 10 நிமிடம், இன்றைய கர்ணன்.. வாழும் வள்ளல்.. புரட்சித்தலைவி அம்மா, தானே புயலால் பாதிக்கப்பட்டவர்களுக்கு வாரி வழங்குவது சரியான டைமிங் டாக்குமென்ட்டரி. 'முடியலைப்பா' என ஆடியன்ஸ் அலறிய பின்னும் நெஞ்சில் ஈவிரக்கமின்றி ஆப்பரேட்டர் முழுவதையும் ஓட்டி முடித்த பின்னரே படத்தை போட்டார்.

சிவாஜி அறிமுகத்திற்கு கைதட்டல், காதல் காட்சிகளுக்கு விசில், என கொண்டாட்டமான ஆடியன்ஸ். பெரும்பாலும் இளைஞர்கள். வயது முதிர்ந்தவர்கள் அமைதியாக ஆனந்தமாக ரசித்துக்கொண்டிருந்தார்கள். என் அம்மா உட்பட. முதல் பாதியை விட இரண்டாம் பாதி வெகு வேகமாக செல்கிறது. அதிலும் கண்ணனாக என்.டி.ஆர் அறிமுகமாவது முதல் படம் கலாட்டாதான்.

முழுமையாக டிஜிட்டல்மயமாக்கப்படாவிட்டாலும், பல காட்சிகளை பளிச்சென்று பூஸ்ட் அப் செய்திருக்கிறார்கள். இயன்ற இடங்களில் எல்லாம் பின்னணி இசை மிருதுவாக டிஜிட்டலில் ஒலிக்கிறது. நினைத்தால் முழுவதுமாக டிஜிட்டலைஸ் செய்ய முடியும் என்றாலும், வரவேற்பு எப்படியிருக்கும் என தெரியாத நிலையில் இது ஒரு பரீட்சார்த்த முயற்சியாக செய்துபார்த்திருக்கலாம்.   மொக்கைப்படங்களாய் வெளியிட்டு விட்டு திரைத்துறை செத்துக்கொண்டிருக்கிறது என புலம்புவதற்கு பதிலாக இதுபோல பழைய படங்களை செப்பணிட்டு திரையிடுவதே மேல்!  தற்போது இம்முயற்சிக்கு கிடைத்திருக்கும் நல்ல வரவேற்பின் மூலம் அடுத்தடுத்து பெரும் முதலீட்டில் முழுமையான டிஜிட்டல் பிரிண்டுகளில் பழைய படங்களை எதிர்பார்க்கலாம்.

"சின்ன வயசுல பார்த்தது.. ம் ம்.." என படம் முடிந்து வெளியே வந்து கொண்டிருந்தபோது அம்மா சொன்னார். அவரது அந்த "ம்ம்.."  எனக்கு சொல்ல முடியாத மனநிறைவை தந்தது.

Monday, March 5, 2012

இந்த புத்தகத்திற்கு விமர்சனம் தேவையில்லை

1975 தொடங்கி 2007 வரையிலான உலகக்கோப்பை கிரிக்கெட் போட்டிகளின் ஹைலைட்ஸை விழுந்து விழுந்து சிரித்துக்கொண்டே பார்த்தால் எப்படி இருக்கும். சதீஷ் கிருஷ்ணமூர்த்தி எழுதியுள்ள 'உலகக்கோப்பை கிரிக்கெட் வரலாறு'  புத்தகம் அவ்வாறான இனிமையான அனுபவமாக இருக்கிறது.

இந்த புத்தகத்திற்கு விமர்சனம் தேவையில்லை. புத்தகத்திலிருந்து சில மேற்கோள்களை மட்டும் காட்டியுள்ளேன். நீங்களே படித்து பாருங்கள். கிரிக்கெட் ஆர்வலராய் இருந்தால் உடனே வாங்கிவிடுவீர்கள்.





174 பந்துகள் ஆடிய கவாஸ்கர் அடித்த ரன்கள் 36 மட்டுமே. ரன் எடுக்க வேண்டும் என்ற பிரக்ஞையே இல்லாமல் நின்ற இடத்திலேயே சிலை போல் நின்று ஆடி, போட்டி முடிவதற்குள் கவாஸ்கர் கால்களை கரையான் அரிக்கத் தொடங்கிவிட்டது போங்கள்.
....


அந்தக் காலத்தில் மேற்கு இந்தியத் தீவுகளுக்கு சென்று எந்தத் தென்னை மரத்தை ஆட்டினாலும் ஒரு நான்கைந்து வேகப்பந்து வீச்சாளர்கள் மேலிருந்து விழுவார்கள் என்றால் பார்த்துக் கொள்ளுங்களேன்!
....


இங்கிலாந்தில் இந்திய அணி சென்று இறங்கிய போது ஒருவரும் அவர்களை சீரியஸாக எடுத்துக்கொள்ளவில்லை.  ஏர்போர்ட்டுக்கு வண்டியை அனுப்பியதே பெரிய விஷயம்தான்.

....


அரவிந்த டிசில்வா சந்தித்த முதல் பந்திலிருந்து அடித்த அடியில் இந்திய அணியினர் திக்குத் தெரியாமல் ஓடினர்.  'நாலு பவுண்டரி ஒரு ரூபா' என்று கூவிக்கூவி அடித்தார். 

....


அபூர்வ சகோதரர்கள் மார்க் வாவ் - ஸ்டீவ் வா இருவரும் தமிழ் படங்களில் க்ளைமாக்ஸில் பிரிந்திருந்த சகோதரர்கள் ஒன்று சேர்ந்து வில்லனில் ஆட்களை அடித்து நொறுக்குவது போல நியூசிலாந்து பவுலர்களை போட்டுச் சாத்தினர்.
....


ஒன்றல்ல, இரண்டல்ல, 979 வைட் பால்கள் போடப்பட்டன. இத்தனை வைடையும் பறவை போல் கையை விரித்து, காட்டிக் காட்டிக் கோப்பை முடிவதற்குள் அம்பயர்களுக்கு பறக்கும் சக்தியே வந்துவிட்டது போங்கள்.
....


ரமேஷ் அவுட் ஆக, உள்ளே நுழைந்தார் 'இலக்கணப் புகழ் ராகுல் டிராவிட். 'யாமிருக்க பயமேன்' என்பது போன்ற ஆட்டம் அன்று அவருடையது. 'என்னை அவுட் ஆக்க வேண்டுமென்றால் ஒரு நான்கைந்து பவுலர்கள் சேர்ந்து போட்டால்தான் உண்டு' என்பதைப் போன்ற இலக்கணப் பிழையில்லாத அப்பழுக்கற்ற ஆட்டம்.
....


அடுத்த ஆட்டம் ஆஸ்திரேலியாவுடன். ஒருநாள் போட்டியாக தொடங்கிய ஆட்டம் இந்திய பேட்ஸ்மேன்களின் கேடுகெட்ட ஆட்டத்தால் அரை தினப் போட்டியாக ஆனது.
....


சேவாக் ஏதோ தன் பங்குக்கு நின்று 81 பந்துகளில் 82 ரன்கள் எடுத்து ரன் அவுட் ஆக, மற்ற அனைவரும் 'எங்களுக்கு எதுவுமே தெரியாது, எங்களை தயவு செய்து விட்டு விடுங்கள்' என்று சரண்டர் ஆக 40வது ஓவரிலேயே 234 ரன்கள் மட்டுமே எடுத்து இந்திய ஆல் அவுட்.


எட்டாவது உலகக் கோப்பை நமக்கு எட்டாத உலகக் கோப்பையானது!

....


மைதானத்துக்குள் ட்ரம், ட்ரம்பெட் எல்லாம் எடுத்துக்கொண்டு போக தடை விதிக்கப்பட்டது.  அத்தோடு மைதானங்களில் இருந்த கடைகளில் சேல்ஸ் நன்றாக இருப்பதற்காக ரசிகர்கள் தாங்களே வெளியேயிருந்து சரக்கை உள்ளே எடுத்துப் போகக் கூடாது என்று ஒரு நிபந்தனை வேறு. மேற்கிந்திய ரசிகர்கள் மூச்சு விடாமல் வேண்டுமானால் ஒரு நாள் முழுவதும் இருப்பார்கள். சரக்கில்லாமல் அவர்களுக்கு இருப்புக் கொள்ளாது.


'யோவ், ட்ரம் எடுத்துண்டு போகக் கூடாதுங்கற சரி, ரம் எடுத்துண்டு போகக் கூடாதுன்னா அந்த மேட்சை நீயே உட்கார்ந்து பாரு' என்று பலரும் டி.வி.யும் சைட் டிஷ்ஷுமாக வீட்டிலேயே செட்டில் ஆகிவிட்டார்கள்.

....


இந்தியாவின் அடுத்த போட்டி பெர்முடாவுடன். மொத்தமே 66,000 மட்டுமே ஜனத்தொகை கொண்ட அநியாயத்துக்கு சிறிய நாடு அது. என்ன, அந்நாடு நம் சென்னை சிதம்பரம் ஸ்டேடியம் சைஸ்தான் இருக்கும் போலிருக்கிறது.
....



உலகக்கோப்பை நேரத்தில் வெளியிடப்பட்டுள்ளதால், 2011 போட்டிகள் குறித்து இப்புத்தகத்தில் இல்லை. அதையும் சேர்த்து ஒரு அப்டேட்டட் வெர்ஷனை வெளியிட்டால் இன்னும் அட்டகாசமாக இருக்கும்.

நல்ல தகவல்களை நகைச்சுவை நடையில் படைத்து அசத்தி இருக்கும் ஆசிரியர்க்கு மனமார்ந்த வாழ்த்துக்கள்!

உலகக்கோப்பை கிரிக்கெட் வரலாறு
விலை : ரூ.50
ஆசிரியர் : சதீஷ் கிருஷ்ணமூர்த்தி
கிழக்கு பதிப்பகம்

___________________________________

எனது பிற புத்தக விமர்சனங்கள்/அறிமுகங்கள் :
http://www.valaimanai.blogspot.in/p/blog-page_10.html