Tuesday, September 29, 2009

ஆறுமுகம் திரைப்படம் - சனி பெயர்ச்சிக்கு சிறந்த பரிகாரம்


உங்க ராசிக்கு சனி பெயர்ச்சியினால கண்டம் இருக்கு இனிமே டைம் சரியா இருக்காது. அதனால உங்க வாட்ச் கூட சரியா ஓடாதுன்னு ஏதாவது வாரா இதழ்ல படிச்சீங்களா... அதையே மண்டையில போட்டு யோசிச்சிக்கிட்டு இருந்தா எப்படி... நம்மக்கிட்ட சொல்ல வேண்டியதுதான...
இதோ பாருங்க நீங்க எந்த ராசியா வேணா இருந்துட்டு போங்க இந்த சனி பெயர்ச்சி பத்தி நீங்க ஒன்னியும் கவலை பட வேணாம்... நீங்க செய்ய வேண்டியது எல்லாம் ஒரே ஒரு பரிகாரம்தான்... நேரா போயி சின்ன தளபதி பரத் நடிச்சிருக்கிற ஆறுமுகம் படத்தை ஒரே ஒரு வாட்டி முழுசா பாருங்க. (பாதியில எழுந்து வந்தா பரிகாரம் பலிக்காது. அப்புறம் நிர்வாகம் பொறுப்பல்ல சொல்லிபுட்டேன்.)
இந்த படத்தை பாத்தா எப்படிங்க தோசம் போகும்னுதானே கேக்குறீங்க. வரேன் வரேன்... இந்த படத்தை முழுசா பாத்துட்டீங்கன்னா உலகத்துல வேற எந்த கொடுமையும் ஒரு விஷயமாவே உங்களுக்கு தெரியாது... ஏன்னா படம் முழுக்க கொடுமையோ கொடுமை அவ்ளோ கொடுமை கொட்டி கிடக்கு...
நாம லொள்ளு சபா பாத்திருப்போம். ஒரு நல்ல படத்தை எடுத்துகிட்டு அதே காட்சிகளை காமெடியா மாத்தி அமைப்பாங்க. இங்க பாருங்க அண்ணாமலை படத்தை அப்படியே எடுத்து அதை எவ்வளவ்வு அசிங்க படுத்த முடியுமோ அவ்வளவ்வு அசிங்க படுதியிருக்கங்க.... எனக்கு தெரிஞ்சி லொள்ளு சபால கூட ஒரு படத்தை இவ்ளோ அசிங்க படுத்தியது இல்லை. வேற யாராவது எடுத்திருந்தா கூட மன்னிச்சிடலாம். ஆனா அண்ணாமலை எடுத்த அதே டைரக்டர் சுரேஷ் கிருஷ்ணாவே இந்த வேலையை செஞ்சிருக்காருன்னா அட போங்க சார் ரொம்ப சின்ன பிள்ளைதனமா இருக்கு.
ஏன்டா கண்ணா பின்னானு எழுதுற படம் எடுக்குறவங்க பாவம் இல்லையானு தயவு செஞ்சு யாரும் கேட்டுடாதீங்க. ஆறுமுகம், டைரக்சன் சுரேஷ் கிருஷ்ணானு விளம்பரத்துல போட்டிருந்துச்சு . சரி நல்ல இயக்குனாராச்சேன்னு அவரை நம்பி போனேங்க. அண்ணாமலை, பாட்ஷா, போன்ற பல வெற்றி படங்களை எடுத்த இயக்குனரா இது.. எனக்கெனவோ ஒரு டவுட்... இந்த பிரபல பதிவர்கள் பெயரில் போலியானவர்கள் பதிவு போடுவது போல யாரோ போலி சுரேஷ் கிருஷ்ணா இந்த படத்தை எடுத்திருக்க கூடும் என நினைக்கிறன்.
அண்ணாமலை படத்தை அப்படியே 80 சதவிகிதம் எடுத்து வச்சிருக்காரூங்க. மீதி 20 % நல்லா இருக்கானு கேக்காதீங்க. அதுல படையப்பா-10%, பாட்ஷா- 5%, , சிவாஜி- 2%, தெலுங்கு படங்களின் வாசனை - 3% என்கிற பார்முலாவில் உள் பங்கீடு இருக்கு. இவ்வளவும் சூப்பர் ஹிட் படங்களாச்சே .. இதோட கலவை எப்படி சூப்பரா இருக்கும்னு யோசிக்கிறீங்களா.. நீங்க ரொம்ப பாசிடிவ் கேரக்டர் சார் !
ஆனா நீங்களே ஒரு பயங்கர நெகடிவ் கேரக்டரா இந்த கலவையை யோசிச்சி பாருங்க. சாம்பார், சட்னி, குருமா எல்லாத்தையும் மிக்ஸ் பண்ணா வாந்தி எடுக்குற மாதிரி ஒரு காக்டைல் வருமே.. ஆங்... கரெக்ட்டு. படம் அப்பிடி இருக்க்கி....
அதுல பால் வியாபாரம் இதுல இட்லி வியாபாரம். அதுல அப்பா கட்டுன வீடு இதுல அம்மாவோட சமாதி. அதிலும் சமாதியை இடிச்ச உடனே பரத் சொல்ற டயலாக் செம காமெடி. இவ்ளோ நாள் உயிரோட (?) சமாதியில இருந்த எங்க அம்மாவை இடிச்சி கொன்னுடீங்களேடா ....( ஸ்..ஸ்... ப்பா... முடியல... சுரேஷ் கிருஷ்ணாவுக்குள்ள ஒரு மினி பேரரசு ஒளிஞ்சிக்கிட்டிருக்கார்னு இப்பதான் தெரியுது ) அப்புறம் அண்ணாமலை வரலாற்று சிறப்பு வாய்ந்த சபதம் டயலாக்... உன்னோட முன்னேற்றத்தை தடுத்து நிறுத்தி........ அப்படியே காப்பி பேஸ்ட் பண்ணி அதை எவ்வளவவு அசிங்க படுத்த முடியுமோ அவ்வளவ்வு அசிங்க படுத்தி இருக்காங்கம்மா.
சரத்பாபு கேரக்டர்ல ஒரு புது முகம்(எங்கேயோ பாத்த மாதிரி இருக்கு). ராதாரவி கேரக்டர்ல ரம்யாகிருஷ்ணன். குஷ்பூ கேரக்டர்ல ப்ரியாமணி ஆண்டி. ஜனகராஜ் கேரக்டர்ல கருணாஸ். வைஷ்ணவி கேரக்டர்ல சரண்யா மோகன். அப்புறம் சொல்லவே வருத்தமா இருக்கு ரஜினி கேரக்டர்ங்க்ற நெனப்புல பரத் ( சத்தியமா முடியல).
அநேகமாய் அந்த சிவப்பு கலர் துண்டு இப்போதெல்லாம் கோ-ஆப்டெக்சில் கூட விற்கமாட்டார்கள் ஆனால் அதை இந்த பரத் எங்கு போனாலும் இடுப்பில் கட்டி கொண்டு அண்ணாமலை லுக் வர வழைக்க முயற்சி செய்திருக்கிறார் பாருங்க.... சரி இடுப்பில் துண்டு கட்டினால்தான் ரஜினி லுக் வரவில்லை செகண்ட் ஹாபில் கோட் சூட் போட்டாலாவது பணக்கார அண்ணாமலை கெட்டப் வருமா என்றால்.. அட போங்கடா அதுக்கு அந்த துண்டே தேவலை.
சரத் பாபு கேரக்டர்ல அந்த நடிகர் ஒன்னும் சொல்றதுக்கில்லை. ரம்யா கிருஷ்ணன் படையப்பா நீலாம்பரி என நினைத்து கொண்டு ரொம்பவும் இம்சிக்கிறார். அதிலும் அவர் வரும் காட்சிகளில் "இஸ் புஷ் தஸ் முஷ்" என டெரராய் பின்னணி இசை கொடுத்திருக்கிறார்கள் பாருங்கள்... அப்படியே நாம் பயந்து விடுகிறோம் எப்படா வீட்டுக்கு போறதுன்னு. சரண்யா மோகனை இதுக்கு மேல யாரும் மொக்கை பண்ண முடியாது. (ஏன் மேடம் நல்லா தானே போய்கிட்டு இருந்துச்சு...?)
இதுக்கு மேலவும் கை பர பரன்னு டைப் அடிக்கனும்னு தோணுது. ஆனா இப்படியே போனா இந்த படத்தை பத்தி ஒரு ப்ளாகே ஆரம்பிக்கிற அளவு மனம் குமுறுவதால் இதோட நிறுத்திக்கிறேன்.
கடைசியா ஒரு விஷயம். நீங்க ரஜினி ரசிகரா இருந்தா படம் பாக்கும்போது தியேட்டர் ஸ்க்ரீனை கிழிக்கணும்னு தோணும். நீங்க ரஜினி ரசிகர் இல்லேன்னா உங்க சட்டையை கிழிக்கணும்னு தோணும். நீங்க பதிவரா இருந்தா வீட்டுக்கு போய் பதிவு போட்டு கிழிக்கணும்னு தோணும். ஆக மொத்ததுல ஆறுமுகத்துல அப்படி என்னத்த கிழிச்சிருக்காங்கன்னு யாரும் கேக்க முடியாது!

Friday, September 25, 2009

பதிவர் கேபிள் சங்கர்ஜி தொல்லை தாங்க முடியலப்பா....


பின்ன என்னங்க... நான் பாட்டுக்கு ரெண்டு போட்டோ போட்டு நாலு கமெண்ட் கொடுத்து ரஜினி, கஜினினு கில்மாவா தலைப்பு வச்சு பொழப்பு ஓட்டிகிட்டிருக்கேன். அது பிடிக்கலை இவருக்கு. அடிக்கடி நீ எழுதுயா.. நல்லா வரும்யா.... கமான் கமான்னு ஒரே உற்சாகப்படுத்துறாரு. அதான் அவரு படுத்துற படுத்துல (அதான்... உற்சாகம்... உற்சாகம்.. ) ஏதாவது எழுதி பாப்போமேன்னு உக்கார்ந்தேன். அப்படியாகப்பட்ட வரலாற்று சிறப்பு வாய்ந்த முதல் மொக்கை பதிவை அவருக்கே டெடிகேட் செய்யும் விதமாக "திரை அரங்க விமர்சனம்" எழுதுறேன். நல்லா இருந்தா நம்மளை கவனிங்க. நல்லா இல்லைனா, ஏங்க... இவனெல்லாம் எழுதலைன்னு எவன் அழுதான்னு நீங்க தாராளமா அவரையே 'கவனிங்க...!'
தல கேபிள்ஜி நாலு லட்சம் ஹிட்ஸ் தாண்டியதற்கும் அலெக்சா ரேட்டிங்கில் ஒரு லட்சத்திற்குள் வந்ததற்கும் (98,186 ) வாழ்த்துக்கள் !
_____________________________________________

கடைசியாய் கமலா தியேட்டரில் சிவாஜி படம் பார்த்தது. இப்போ என்னமாய் மாறி இருக்கிறது தெரியுமா ? நம்பவே முடியவில்லை. உள்ளே நுழையும் போதே... "சார்... ட்ரிங்க்ஸ் சாப்பிட்டு உள்ள போக கூடாது" என சொல்கிறார்கள்." அது ஏன் சார் எங்களை பார்த்து அந்த கேள்வியை கேட்டீங்க என நானும் ஒரு எதிர் கேள்வியை கேட்டேன் . கூட வந்த என் நண்பன் கிருஷ்ணா கமலா தியேட்டர் இப்படி கெட்டுபோய் விட்டதே என புலம்பியபடியே வந்தான்..!

பொக்கிஷம் படம்! பாக்ஸில் டிக்கெட் எடுத்து கொண்டு போய் உட்கார்ந்தோம். பரவாயில்லை. கமலா தியேட்டருக்கான எந்த அடையாளமும் இப்போ தெரியாமல் நல்லா செய்திருக்கிறார்கள். விளம்பர ஸ்லைடுகள் போட ஆரம்பித்தவுடன் ஒரு காதல் ஜோடி வந்தது. அவர்களுக்கு நடுவில் சீட்... நாங்கள் கார்னரில் இருந்தோம்.. பய புள்ள கிருஷ்ணாவோடு கார்னர் சீட்டில் உட்கார்ந்து என்ன ஆகா போகுது..? 'பெக்க பெக்க' என முழித்து கொண்டிருந்த அந்த காதல் ஆண் புறாவிடம் "பாஸ்.... இங்க வந்திடுங்க..." என்றதும் ஆர்வத்தோடு சீட் மாற்றி கொண்டான். என் தலைமுறைகளையே அந்த நேரத்தில் மனமார வாழ்த்தி இருப்பான் என அவன் தேங்க்ஸ் சொன்ன விதத்திலேயே உணர முடிந்தது.

படம் ஆரம்பித்தது.. சேரன் படம்.. இதோ நல்லா போகும்... இதோ நல்லா போகும்... என மனதை தேற்றி கொண்டே பார்த்ததில் இடைவேளையே வந்துவிட்டது. பளிச்சென்று வந்த வெளிச்சத்தில் அப்போதுதான் அந்த காதல் ஜோடியை பார்த்தேன். பகீரென்றது !

என்னதான் காதலர்களாயினும் ஒரு காதலன் இப்படியா நடந்துகொள்வது... அவன் மனுஷனா இல்ல மண்ணாங்கட்டியா என்றே தெரியவில்லை.. சொல்லவே நாக்கு கூசுகிறது.. அந்த பெண் படம் பார்த்து கொண்டிருக்க .. அவன் தூங்கி கொண்டிருந்தான் சார்.. தூங்கி கொண்டிருந்தான். இந்த மாதிரி கொடுமையும் எங்காவது நடக்குமா... ? நண்பன் கிருஷ்ணா வாங்கி கொடுத்த கொக்க கோலாவை இறக்கி தொண்டையை அடைத்த துக்கத்தை போக்கினேன்.

இடைவேளைக்கு பிறகும் படம் தேறாது என கன்பார்ம் ஆனதால் கமெண்ட் திருவிழாவை ஸ்டார்ட் பண்ண ஆரம்பித்தேன். 1980 களில் சேரன் லெட்டர் எழுதுவதுதான் படமே. ஒரு காட்சியில் சேரன் பத்மப்ரியாவை பார்பதற்காக ஊருக்கு வந்துவிட்டு வேலை விஷயமாக வந்தேன் என அப்பா விஜயகுமாரிடம் சொல்லுவார். அதை கண்டு விஜயகுமார் "என்கிட்ட பொய் சொல்றியேப்பா..." என்பார். அந்த இடத்தில் நான் "1940 ல அவரு எவ்ளோ லெட்டர் எழுதியிருப்பாரு...அவருகிட்டயேவா " என டைமிங் கமெண்ட் அடித்தேன். அதை கேட்டு பாக்ஸில் என்னையும் தூங்கி கொண்டிருந்த அந்த வெண்ணையும் தவிர்த்து பாக்கி இருந்த பதினாலு பெரும் கொல்லென சிரிக்க, பதிவு போட்ட பத்தே நிமிஷத்தில் பதினஞ்சு பின்னூட்டம் வந்தது போல ஒரே ஜிவ்வுன்னு ஆகி அடுத்தடுத்து கமெண்ட் அடிக்க ஒரே காமெடி திருவிழாதான்.

நான் மொக்க ஜோக் அடித்தாலும் தொடர்ந்து அந்த பெண் புறா சிரிக்க ஆரம்பித்து விட்டது . ( நம்ம ப்ளாக் பாலோயர்ஸ் மாதிரி ரொம்ப நல்ல கேரக்டர் போலிருக்கு) அலாரம் அடிச்சா ஆப் பண்ணிட்டு தூங்கிடலாம்... ஆம்புலன்ஸ் அடிச்சா ஆப் பண்ண முடியுமா ? மத்தவன் ஜோக்குக்கு தன் பிகர் சிரிப்பதையும் தாண்டி யாராவது நிம்மதியாய் தூங்க முடியுமா என்ன? அதற்கப்புறம் அவன் தூங்கவே இல்லை ! சீரியசான சினிமாவை விட்டுட்டு சிரிச்சிக்கிட்டிருக்கிற என்னையே பாத்துக்கிட்டு மட்டுறுத்தல் செய்யப்பட்ட அனானி பின்னூட்டம் மாதிரி அம்போன்னு பாவமாய் உட்கார்ந்திருந்தான் !

____________________________

அமைந்தகரை முரளிகிருஷ்ணா தியேட்டரில் சின்ன வயசில் குடும்பத்தோடு படம் பார்க்க போவோம். கடந்த மாதம் அலுவலக விஷயமாய் வெளியே சுற்றிய ஒரு சுபயோக தினத்தில் ஒரு மணி நேரம் துண்டு விழுந்தது. பார்த்தால் பக்கத்தில் முரளி கிருஷ்ணா . அன்று தான் மதுரை சம்பவம் திரைப்படம் ரிலீஸ். இந்த தியேட்டர் போய் ரொம்ப நாளாச்சே சும்மா இடைவேளை வரை பார்க்கலாம் என போனேன். இப்போதும் இங்கே பால்கனி டிக்கெட் விலை வெறும் 20 ரூபாய்தான். சவுண்ட் சிஸ்டம் எல்லாம் நல்லா இம்ப்ரூவ் செய்திருக்கிறார்கள்.

அப்போதெல்லாம் இந்த தியேட்டரில் மூட்டைபூச்சி பயங்கரமாய் கடிக்கும். இந்த முறை ஹரிகுமாரின் "தெக்குல திண்டுக்கல்லு..." போன்ற அற்புத டயலாக் டெலிவரியில் நான் லயித்திருந்தேன். மனிதர் பயங்கரமாய் கடித்ததால்.... ச்சே... நடித்ததால் மூட்டை பூச்சி கடித்ததா இல்லையா என்பன போன்ற சின்ன கடிகளை என்னால் சரியாய் நினைவு கூற முடியவில்லை. இன்னும் இரண்டே படம் நடித்தால் ஹரி தமிழ் சினிமாவின் தவிர்க்க முடியாத ஹீரோ ஆவது நிச்சயம்.

இடைவேளை வரை பார்த்த மட்டும் என் 'கேன த்ரிஷ்டியில்' நான் அறிந்து கொண்டது... விரைவில் ஹரிகுமார் சூரதளபதி ஆகும் ஆபத்து தமிழகத்திற்கு இருக்கிறது என்பதைத்தான். அகில இந்திய ஹரிகுமார் ரசிகர் மன்றம் ஆரம்பித்து விடலாமா என தீவிரமாய் யோசித்து வருகிறேன். யார் கண்டார்.... ஒரு வேளை 2011 -ல் இவரே முதல்வர் ஆகிவிட்டால் கவியரங்கத்தில் அவரை வாழ்த்தி பாட 'வெயிட்டான' கவிஞர் போஸ்டிங் ஏதாவது எனக்கு கிடைக்குமுல்ல !!

( தங்கள் தலைவர் பற்றி அப்டேட் ஏதும் வராமல் போஸ்டர் ஒட்டி பல மாதங்களாகி காய்ந்த கையோடும் காலியான பர்சோடும் காத்திருக்கும் ஜே.கே.ரித்தீஷ் மன்ற ரசிகர்கள் எங்கள் மன்றத்துக்கு வரவேற்கப்படுகிறார்கள்! )

________________________________________________

அப்புறம் கோயம்பேடு ரோஹிணி தியேட்டர் பற்றி கண்டிப்பா சொல்லணும். அங்க மதுரை சம்பவம் படம் மாதிரி என் வாழ்கையில் பல அதிருற சம்பவம் நடந்திருக்கு....

இந்த மொக்கையை படிச்சிட்டு நாளைக்கும் வரணும்னு நெனக்கிற அளவுக்கு நீங்க நல்லவரா இருந்தா அடுத்த பதிவில் அதை பத்தி சொல்றேன்......!! சந்தேகமே இல்லை இனி வரவே மாட்டேனு சொல்றீங்களா.... அப்ப சாமி போகும்போது ஓட்டாவது போட்டுட்டு போங்களேன்... கார்னர் சீட்ல உக்காந்துக்கிட்டு காதல் ஜோடிக்கு இடம் விடாம நீங்க செஞ்ச பாவமெல்லாம் தீர்ந்து உங்களுக்கு புண்ணியமா போகும் !!!

Wednesday, August 19, 2009

சேரனுக்கு ஒரு ரசிகனின் மின்னஞ்சல்

அன்புள்ள லெனின் என்கிற சேரன் அவர்களுக்கு...
தினமும் படுத்தி எடுக்கும் ஆபிசை கட் அடித்து ஒரு இனிய காலை பொழுதில் பொக்கிஷம் பார்க்க போனேன். அதற்கு நீ ஆபிசுக்கே போய் இருக்கலாம் என இதை படிக்கும் பதிவு உலக நண்பர்கள் பின்னூட்டம் இடக்கூடும். ஆனால் நான் அவ்வாறு கூற மாட்டேன் . ஏன் எனில் இந்த படத்திற்கு கிடைத்த எதிர்மறை விமர்சனங்களையும் மீறி உங்கள் முகத்துக்காக மட்டுமே பொக்கிஷம் பார்க்க போனேன். ஆனால் உங்கள் முகமே பொக்கிஷம் படத்திற்கு பெரிய எதிர்மறை விஷயமாகி விட்டிருக்கிறது என்பதை உங்கள் ரசிகனாய் நான் சொல்லித்தான் ஆக வேண்டும்.
ஆட்டோகிராப், தவமாய் தவமிருந்து ஏன் மாய கண்ணாடியில் கூட பளிச்சென்று இருந்த நீங்களா அது....? கடைசி வரை வயதான சேரனை காட்டவே இல்லையே என படம் பார்க்க வந்திருந்த என் நண்பனிடம் கேட்டேன். அப்ப படத்துல வந்த சேரன் மட்டும் எப்படி இருந்தாராம் என கமெண்ட் அடித்தான். உங்கள் ரசிகர்களிடமிருந்தே இவ்வாறு கேட்டபது கஷ்டமாய் இருந்தாலும் உங்களின் உண்மையான ரசிகர்களின் விருப்பம் / நலன் கருதி அடுத்த படத்திலாவது வேறு ஹீரோவிற்கு பரிசீலனை செய்தால் நன்றாக இருக்கும்.
யாரும் யோசித்திராத களங்களில் சிந்தனைகளை சொல்லி தமிழ் திரையுலகில் நீங்கள் தனி இடம் பெற்று விட்டதனால் இன்றும் உங்களுக்கு பெரிய ஒபெனிங் இருக்கிறது. மாய கண்ணாடி தோற்ற நிலையில் இந்த கதையின் மேல் நீங்கள் எவ்வளவு நம்பிக்கை வைத்திருந்து எவ்வளவவு பீல் பண்ணி இந்த படத்தை எடுத்திருக்கிறீர்கள் என தெரிகிறது.
பொதுவாக உங்கள் படங்களில் பீலிங்க்ஸ் பயங்கரமாய் இருக்கும். பாரதி கண்ணமாவில் பார்த்திபன் எரியும் சிதையை நோக்கி ஓடும்போதும், பொற்காலத்தில் முரளியின் திருமணம் போதும், ஆட்டோகிராப்பில் மாலையுடன் படகில் செல்லும் கோபிகாவை மயக்கத்தில் நீங்கள் பார்க்கும் போதும் சுவாசிக்க முடியாமல் தவித்திருக்கிறேன். ஆனால் உங்களின் மற்ற படங்களை விட இந்த படத்தில் பீலிங்க்ஸ் அதி பயங்கரமாய் இருக்கிறது. படம் பார்க்கும் எங்களை தவிர திரையில் எல்லா காட்சியிலும் லெனின், நதீரா, தந்தை, மகன், நண்பன் என அனைத்து கதா பாத்திரங்களும் ஆளாளுக்கு பீல் பண்ணி கொண்டே இருக்கிறார்கள். இது போதாதென்று கடைசியில் வரும் லெனினின் மனைவி ரொம்ப ஓவராய் பீல் பண்ணுகிறார். ஆளாளுக்கு பீல் பண்ணுவது படம் எப்ப முடியுமோ என எனக்கு ரொம்ப பீலிங்க்ஸ் ஆகி விட்டது.
அந்த காலத்து கடித போக்குவரத்தின் காத்திருத்தலையும் தவிப்பையும் இன்றைய இளைய தலைமுறைக்கு சொல்ல முற்பட்டிருக்கிறீர்கள். ரொம்ப சந்தோஷம். அதற்காக படம் முழுவதும் கடிதம் எழுதுவதும் அதை வரி விடாமல் முழுவதும் படித்து காட்டுவதும் நதிராவிடமிருந்து கடிதம் வரவில்லை என அடிக்கடி நீங்கள் தவிப்பதுமாய் திரும்ப திரும்ப வரும் ஒரே காட்சிகளினால் கவனம் சிதறி தூரத்து சீட்டில் கற கற மொற மொற வென யாரோ வீல் சிப்ஸ் கடித்து கொண்டிருந்த்தின் மேல் எனக்கு கவனம் சென்று செம கடுப்பாகி விட்டது.
எல்லாவற்றையும் மீறி குறையே சொல்ல முடியாத ஓளிப்பதிவு, ஒலி சேர்க்கை, ஸ்பெஷல் எபெக்ட்ஸ், லோகஷன்ஸ் என உங்கள் ப்ரெசென்ட்டேஷன் தியேட்டரை விட்டு எழுந்து போக விடாமல் தடுக்கிறது.
ஒருவேளை தப்பி தவறி இந்த மின்னஞ்சல் உங்கள் கண்ணில் பட்டு தொலைந்தால் நீங்கள் புண் பட கூடும். நீங்கள் இது போன்ற வார்த்தைகளை ஏற்று கொள்ள சிரம படுவீர்கள் என எனக்கு தெரியும். மாய கண்ணாடி தோல்வி அடைந்த நிலையிலே தினமும் விளம்பரம் கொடுத்தீர்கள்... நாங்கள் சொல்ல வந்ததை நீங்கள் சரியாய் புரிந்து கொண்டீர்களா என எழுதி அனுப்புங்கள்... பரிசு கொடுப்போம் என அறிவித்தீர்கள்... சார்.. எங்களுக்கு சரியாய் புரிந்ததால்தானே அந்த படமே பிடிக்காமல் போனது ....எது எடுத்தாலும் எங்களுக்கு பிடிக்க வேண்டும் என்கிற அளவிற்கு நீங்கள் யோசிக்க மாட்டீர்கள் என நம்புகிறேன்.
ஆட்டோகிராப் படத்தினால் எங்களை பீலிங்க்ஸ் ஆக்கினீர்கள். எங்களால் மறக்க முடியாதுதான். அதற்காக இனியும் உங்களிடம் மக்களை பீலிங்ஸ் ஆக்கி அழ வைக்க வேண்டும் என்கிற கதைகள் இருந்தால் தயவு செய்து கொஞ்ச நாள் அவைகளை ஏதாவது பெட்டியில் வைத்து பூட்டி பொக்கிஷம் ஆக்கிடுங்க பாஸ்... உங்க லெவலே வேற... எங்களின் சிந்தனையை ஹேக் செய்து பத்து பதினைந்து நாட்கள் தவிக்க வைக்கும் அளவிற்கு உங்களால் கதை சொல்ல முடியும். பாத்து பண்ணுங்க பாஸ்...

- உங்களிடமிருந்து நிறைய எதிர்பார்க்கும் ரசிகன்

Tuesday, August 4, 2009

விருது விருது வருது வருது ...!!!!

பதிவுலகில் பட்டையை கிளப்பி கொண்டிருக்கும் சுவாரஸ்ய பதிவர் விருது அங்க சுத்தி இங்க சுத்தி எனக்கும் வந்திடிச்சி....
பதிவர் கலக்கல் கலையும் பதிவர் குடந்தை அன்புமணியும் எனக்கு இந்த விருதை அளித்துள்ளார்கள். அவர்களுக்கு என் நன்றிகள்.
இந்த விருதினை அண்ணன் எம்.எஸ்.வி.முத்து
அவர்களுக்கு வழங்குகிறேன்.





நான் பார்த்த முதல் வலைப்பூ குரல்வலைதான். இரண்டு வருடங்களுக்கு முன்னால் நான் அம்பத்தூரில் உள்ள ஒரு பி.பி.ஒ நிறுவனத்தில் பொட்டி தட்டி கொண்டிருந்த போது நண்பர் ஒருவருக்கு இவரது கதைகள் மின் அஞ்சலில் வரும். அவரிடம் இருந்து அவைகளை பெற்று ஸ்க்ரீனை சின்னதாக்கி வேலை நேரங்களில் கதைகள் படித்து
கொண்டிருப்பேன்... தூரத்தில் இருந்து பார்பதற்கு வேலை செய்வது
போலவே இருக்கும். நேரில் பார்ப தற்கு உன்னாலே உன்னாலே வினய் மாதிரி இருப்பார். இவரது சிறுகதைகள் அட்டகாசமாக இருக்கும். ஆவி பேய் கதைகளில் அண்ணன் நிபுணரோ நிபுணர். சமுதாய அக்கறை கொண்ட இவரது கருத்துக்கள் சிந்திக்க வைக்கும். சிங்கப்பூரில் பணி நிமித்தமாக வசித்து வரும் இவருக்கு என்னுடைய சிறப்பு பரிசு இந்த சுவாரஸ்ய வலை பூ விருது..



___________________________________________________________________________

"இந்த பதிவர் என் சிறந்த நண்பர்"
எனும் விருதினை
அவர்களும்
அவர்களும்
கொடுத்திருக்கிறார்கள் ...
இருவருக்கும்
என் நன்றிகள்....
அந்த விருதினை
தல கேபிள் சங்கருக்கு
அளிக்கிறேன்......






தல கேபிள் சாருக்கு அறிமுகம் கொடுத்தா அது சன் டி.வி.க்கே விளம்பரம் போட்ட மாதிரி ஆயிரும். அதனால டக்குனு சொல்றேன்.
அப்ப நான் புதிய பதிவர் ( டேய் இப்பவும் நீ புதுசுதாண்டா...) இந்த திரட்டி மேட்டர்
எல்லாம் தெரியாது. நானே பதிவு போட்டு நானே படிச்சிக்குவேன். இப்படியே பதிவுலக வாழ்க்கை நிம்மதியா போய் கிட்டிருக்கும்போது ஒரு நாள் தெரியா தனமா ஆனந்த தாண்டவம் படம் பாத்து தொலைச்சிட்டேன். இந்த மாதிரி மொக்கை படம் ரிலீஸ் ஆகுற மோசமான உலகத்துல நாம ஒரு நிமிஷம் கூட உயிரோட இருக்க கூடாதுன்னு முடிவெடுத்தேன்.
சரி நம்மள மாதிரியே யாரவது ஆனந்த தாண்டவம் பாத்துட்டு குத்துயிரும் கொல உயிருமாய் இருக்காங்களான்னு கூகிள் ஆண்டவரை கேட்டபோது கிடைத்த பூ தான் கேபிள் சங்கர் வலை பூ. ஒரு மொக்கை படம் பாத்தாலே பி.பி. ஏறுகிற நிலையில இவர் என்னடானா போஸ்டர் கூட ஓட்ட பணமில்லாத பட்ஜெட் படங்களை எல்லாம் தேடி பாத்து விமர்சனம் எழுதி இருந்தாரு... ஏண்ணே இப்படின்னு கேட்டா அவருக்கு இதேதான் ஹாபியாம். இவ்ளோ நல்லவரா இருக்காரேன்னு தொடர்ந்து அவரது வலைபூவை படிக்க ஆரம்பிச்சேன்.
பதிவுலக மக்கள் தொகை விழிப்புணர்ச்சி, பின்னூட்டங்கள், திரட்டி, லிங்க் , இன்ன பிற விஷயங்கள் எல்லாம் அவரை பார்த்து அறிந்ததுதான். ஏதாவது சந்தேகம் என்றால் எப்போது போன் செய்தாலும் விளக்கி சொல்வார். தெரிந்தவர்கள் தெரியாதவர்கள் புதுசு பழசு என பார்க்க மாட்டார். இப்படியாகப்பட்ட அண்ணன் கேபிள் சங்கருக்கு நண்பர் பதிவர் விருது கொடுப்பதில் மட்டற்ற மகிழ்ச்சி அடைகிறேன் ...!
(இதான் உங்க டக்கா...?)

_________________________________________________________________________

அடுத்ததா பட்டாம்பூச்சி விருது கொடுத்திருக்காரு பதிவர் சுபாங்கன். பல வலைகளில் இந்த பட்டாம்பூச்சி விருதினை பார்த்திருக்கிறேன். எனக்கும் அது கிடைத்தது ரொம்ப மகிழ்ச்சியா இருக்கு. அவருக்கு என் நன்றி.
இந்த பட்டாம்பூச்சி விருதை
பதிவர் வழிபோக்கன் அவர்களுக்கும்
பதிவர் ஸ்வர்ணரேகா அவர்களுக்கும்
அளிப்பதில் நிறைவான மகிழ்ச்சி அடைகிறேன்.....!
__________________________________________________________________________

ஒரு வழியா விருதுகள் கொடுத்தாச்சு.... இந்த நேரத்தில் அண்ணன் எம்.எம்.அப்துல்லாவின் பொன் மொழியை மேற்கோள் காட்ட விரும்புகிறேன்....

"இனி எனக்கு விருது தர இருக்கும் அன்பர்களுக்கு ஒரு அன்பு வேண்டுகோள்...இனி விருதுக்குப் பதிலாக பொற்கிழியோ அல்லது பணமுடிப்போ தந்தால் இன்னும் மகிழ்வேன்."

ரைட்டு....! வரட்டா .... நெக்ஸ்ட் மீட் பண்றேன்....!!

Thursday, July 23, 2009

நண்பர்கள் கமெண்ட் - ஆடி தள்ளுபடி

ஊர் முழுக்க ஆடி தள்ளுபடி, ஆடி கழிவு, ஆடி பரிசுன்னு ஒரே அதகலமா இருக்கே... நம்ம வலைல ஏதவாது ஆடி ஸ்பெஷல் பண்ணலாமுன்னு போன பதிவுல இந்த போட்டோ கொடுத்து ஆடி கமென்ட் கேட்டிருந்தேன்..... நெறைய பதிவர்கள் கமென்ட் கொடுத்து கலக்கிட்டாங்க... ஒவ்வொருத்தர் கம்மேண்டும் தனித்தன்மையா அவங்கவங்க ஸ்டைலில் இருக்குங்க...அதில வழக்கம் போல பட்டுன்னு சிரிப்பு வர்ற ரெண்டு கமெண்டை இங்க கொடுத்திருக்கேன்... அவங்களுக்கு வாழ்த்துக்கள்...! சொன்னபடி அவங்களுக்கான பரிசும் பதக்கமும் அவங்க மின்னஞ்சலுக்கு அனுப்பி வச்சிட்டேங்க.......பின்னூட்டமிட்ட அனைவருக்கும் என் நன்றியோ நன்றி.......!











Friday, July 3, 2009

மறையவில்லை மைகேல் ஜேக்சன் !









கவிதை
மைகேல் ஜாக்சன் ஒரு சகாப்தம் - வலைமனை அஞ்சலி

Michael Jackson Obituary by Valaiamanai blogspot Tamil poems in memory of Michael Jackson by Sukumar Swaminathan

Saturday, June 27, 2009

பள்ளிக்கூடம் போகலாமா ?

இந்த தொடர் பதிவுக்கு அண்ணன் திரு.முரளிக்கண்ணன் அவர்கள் என்னை அழைத்தபோது எனக்கு மகிழ்ச்சியாக இருந்தது. பதிவுலகில் பிரபலமான அவர் என்னை போன்ற புது முகத்திற்கு ஒரு அறிமுகம் கொடுத்தது அவரது பெருந்தன்மையை காட்டுகிறது. அவருக்கு என் நெஞ்சார்ந்த நன்றிகள். அதே சமயம் இவ்வளவ்வு நீளமாய் நான் பதிவு எழுதுவது இதுவே முதல் முறை ஆதலால் பயமாகவும் இருந்தது. என்னால் முடிந்த அளவிற்கு முயற்சி செய்து பார்த்திருக்கிறேன். உங்களது விமர்சனங்களை சொல்லுங்கள்.
_______________________________________________________________


என் கையை பத்திரமா பிடிச்சுக்கோங்க...

ஜூட்டா... எங்க பள்ளிக்கூடம் போகலாமா ?

அட்மிஷன்

என் அம்மாதான் என்னை முதல் நாள் பள்ளியில் சேர்க்க அழைத்து சென்றிருந்தார். அது இருபாலரும் பயிலும் மெட்ரிகுலேசன் பள்ளி. நான் ஐந்தாவது வரை அங்குதான் படித்தேன். பள்ளி என்றால் என்னவென்று அறியாத நிலையில்.. எதிலோ கொண்டு தள்ளுகிறார்கள் என்பது மட்டும் புரிந்தது. இனம் புரியாத ஏக்கமும் உள்ளுக்குள் காரணம் இல்லாத அழுகையுமாய் அங்கு சேர்ந்த முதல் நாள் லேசாய் இன்னும் ஞாபகம் இருக்கிறது. .


உணவு


நான், எனது இரண்டு சகோதரிகள், ஒரு அண்ணன் ஆகிய நால்வரும் ஒரே பள்ளியில் வெவ்வேறு வகுப்புகள் படித்ததால் அம்மா ஒன்றாக அனைவருக்கும் மதிய சாப்பாடு கொண்டு வருவார்கள். வட்டமாய் அமர்ந்து சாப்பிடுவோம்.

'நான் சாதித்தேன்' என்பதற்கு அடையாளமாய் பெருந்தலைவர்கள் எதையாவது விட்டு செல்வதை போல லன்ச் முடிந்து செல்லும் போது 'நான் சாப்பிட்டேன்' என்பதற்கு அடையாளமாய் என் டிபன் பாக்சை சுற்றி உணவு பருக்கைகளை விட்டு சென்றிருப்பேன். உணவை கீழே சிந்தாமல் சாப்பிடுவதும் உள்ளங்கையில் சோறு ஒட்டாமல் சாபிடுவதும் கணக்கு பாடத்திற்கு ஈடாய் பெரும் சவாலாய் எனக்கு விளங்கியது.


நண்பன்

அணிஷ் ! எல்.கே.ஜியில் ஆரம்பித்து இன்று வரை தொடர்பிலிருக்கும் உயிர் நண்பன். அப்போதெல்லாம் எது சொன்னாலும் நம்பி விடும் அப்பாவி. ( இப்ப கொஞ்சம் அடப்ப்ப்பாவி ரேஞ்சுக்கு வந்துவிட்டான் அது வேற விஷயம்)
பள்ளியில் இருந்து வீடு திரும்பும் போது கதை பேசியபடி நடந்து வருவோம். . மிளகாய் தூளில் பிரட்டிய மாங்காய் துண்டு, உப்பு போட்ட அரை நெல்லிக்காய், புளிப்பான கலா காய், கொய்யா, எல்லாமே ஸ்பான்சர் செய்வது அணிஷ்தான்.


அவனது சொந்த ஊர் கேரளா என்பதால் அவனுக்கு மலையாள நடிகர்களை கிண்டல் செய்தால் பொறுக்காது. நமக்குதான் யாருக்கு எது பொறுக்காது என நோட் பண்ணி கிண்டல் செய்வதென்றால் சூடாக சுண்டல் சாப்பிடுவது போல் ஆயிற்றே. ஒருநாள் அவனிடம் பிரபல மலையாள நடிகர் ஒருவர் புட்பால் விளையாடும் பொழுது அடிபட்டு ஆஸ்பத்திரியில்
இருக்கார் என க்ரூப்பாய் கிளப்பி விட்டோம். எதேச்சையாய் மாலையில் அவன் வீட்டுக்கு சென்ற போது அந்த செய்தி எதிலாவது வந்திருக்கிறதா என அன்றைய மலையாள தினசரிகளையும் மாலை இதழ்களையும் கலைத்து போட்டு வீடே நாலஞ்சு பேர் கதக்களி ஆடினாற்போல் கலகலத்து இருந்தது. அவன் நம்பியது மட்டுமலாமல் வீட்டினரையும் நம்ப வைத்திருந்தான்.

இன்று அவனை பார்த்தாலும் "டேய் உங்காளுக்கு அடியாம்டா" என கலாய்ப்பேன். ஆனால் அவனோ அன்று போல் அப்படியா என நம்பாமல் இன்று சிரித்துக்கொண்டே அவ்வளவாய் பாதிப்பு ஏற்படுத்தாத ஸ்மால் சைஸ் கெட்ட வார்த்தையால் திட்டுகிறான்.

போட்டி


நான் ஐந்தாம் வகுப்பு படித்த போது அப்போதைய தூர்தர்ஷன் புகழ் நல்ல தம்பி அவர்கள் சிறப்பு விருந்தினராக ஆண்டு விழாவிற்கு வருவதாய் அறிவிப்பு.


அவர் கையால் ஏதாவது பரிசு வாங்கி விட வேண்டுமென்று பேச்சு போட்டி, பட்டிமன்றம், கவிதை, கன்றாவி என என்னென்ன போட்டிகள் வைத்தார்களோ அத்தனையிலும் புகுந்தேன். எவ்வளவோ கஷ்டப்பட்டு வடை சுட முயற்சித்தாலும் அங்க நம்ம பருப்பு வெந்தாதானே.. ஹூம்... ஒன்னு கூட வேகலை.


தோத்துடுவோம் என தெரிந்தும் கேப்டன் தனியாய் நிற்பது போல் என்ன போட்டி என தெரியாமலே பல போட்டிகளில் நின்று பார்வையாளர்களை நோகடித்தேன். ஒரு கட்டத்தில் போட்டி அமைப்பாளர்கள் என்னை பார்த்து பார்த்து கடுப்பாகி இவனுக்கு பரிசு கொடுக்கிற வரைக்கும் நிறுத்த மாட்டான் போலிருக்கு என அவசர ஆலோசனை ஏதாவது செய்திருக்க கூடும்.. கடைசியாய் பாட்டு போட்டியும் வைத்தார்கள். எவ்வளவோ போட்டிகளை பாத்தாச்சு. பாட்டு போட்டியையும் ஒரு பாடாய் படுத்திவிடுவோம் என ஒரு பாட்டை உளறி வைத்தேன்.


மறுநாள் போட்டி முடிவுகளை பார்த்தால் எனக்கு பாட்டு போட்டியில் இரண்டாம் பரிசு. முதல் பரிசு வாங்கிய மாணவி 'நல்ல வித்துவான்' ரேஞ்சுக்கு பாடியிருந்தாள். இரண்டாம் பரிசை இவன் 'நல்ல கத்துவான்' என எனக்கு கொடுத்தார்களோ என்னவோ... எது எப்படியோ நாங்களும் நல்ல தம்பி சார் கையில பரிசு வாங்கிடோம்முல... போடுறா பட்டாசை....

டீச்சர்

என்னை பாதித்த முதல் ஆசிரியர் ராதிகா டீச்சர்தான். போட்டிகள் என்றாலும் படிப்பு என்றாலும் எல்லாரையும் நல்ல உற்சாகப்படுத்துவார்.
ஜே.கே.ரித்தீஷ் படத்தை சிரிக்காமல் சீரியஸ் ஆக பார்ப்பது எவ்வளவு கஷ்டமோ அவ்வளவு கஷ்டம் எனக்கு ஒரு வகுப்பு முழுவதும் தொடர்ந்து பேசாமல் உட்காருவது.

அதனால் நாங்கள் நாலைந்து பேர் அடிக்கடி 'ஒன் வருது மிஸ்' என 'எஸ்' ஆயிடுவோம். பள்ளியில் தடை செய்யப்பட்ட ரஜினி, கமல் போட்டோக்களை பரிமாற்றம் செய்வது , சினிமா ஒளியும் ஒலியும் குறித்து கலந்துரையாடல்கள் செய்வது என பல இதர பதற வேலைகளை முடித்து பொறுமையாக தாயகம் திரும்புவோம். இதனால் கடுப்படைந்த ராதிகா டீச்சர் ஒன் பாத்ரூம் வந்தால் ஒவ்வோவோருவராய் தான் போக வேண்டும் என கடும் சட்டம் வைத்திருந்தார்.

ஒருநாள் இந்த விதியின் படி 'ஒன்' போக அனுமதி மறுக்கப்பட்ட ஒருவன் இந்த சட்டத்தை உடைக்க திட்டம் போட்டு செய்தானோ அல்லது நிஜமாகவே முடியாமல் செய்தானோ... பண்டைய பூமி பிரிந்து கண்டம் கண்டமாக சிதறியது போல்... வகுப்பினையே கண்டமாக்கி எல்லாரையும் சிதறடித்துவிட்டான். அவனது இந்த அதிரடி தாக்குதலால் நிலை குலைந்து போன ராதிகா டீச்சர் அந்த சட்டத்தை உடனடியாக வாபஸ் பெற்றார்.

அட்மிஷன்

இத்தொடர்பதிவின் நிபந்தனைப்படி தொடக்ககல்வி வாழ்க்கையோடு முடிக்க வேண்டியிருப்பதால் என் ஐந்தாம் வகுப்பு நினைவுகளோடு முடித்து கொள்கிறேன்.
என்னை ஆறாம் வகுப்பில் வேறொரு பள்ளியில் சேர்க்க என் அப்பா அழைத்து சென்றிருந்தார். எல்.கே.ஜி வகுப்பு சேர்க்கும் போது இனம் புரியாத ஏக்கத்துடன் அழுகை வந்தது போல் இப்போதும் பலமாய் அழுகை வந்தது.
ஆனால் இம்முறை அழுவதற்கு வலுவான காரணம் இருந்தது. இருபாலர் படிக்கும் படிக்கும் பள்ளியில் இருந்து விலக்கி வெறும் பசங்க மட்டுமே படிக்கும் ஒரு பாலர் பள்ளியில் என்னை வில்லத்தனமாய் என் அப்பா தள்ளினார். (அப்பாக்கள் எல்லாம் வெவரமா தான் இருக்காங்க )

என் திருவிளையாடல்களையும் வீர பராக்கிரமங்களையும் பிரயோகிக்க சரியான களம் அமையவில்லை என்ற தாளாத துயரோடு ஆறாம் வகுப்பு நோக்கி சென்றேன். !


______________________________________________________________
இந்த பதிவை தொடர
உலக சினிமா திரு. வண்ணத்துபூச்சியார் அவர்களையும்
குமரன் குடில் திரு.சரவணகுமரன் அவர்களையும்
கலக்கல் கலை அலையஸ் திரு.கலையரசன் அவர்களையும்
அன்போடு அழைக்கிறேன். !!!

Tuesday, June 23, 2009

இந்தியன் கிரிகெட் அணியின் லேட்டஸ்ட் பயோடேட்டா

/*இந்த பதிவு முழுக்க முழுக்க கற்பனையே... யார் மனதையும் புண்படுத்தும் நோக்கத்தோடு எழுதப்பட்டது அல்ல.. யாரேனும் புண்பட்டால் தயவு செய்து மன்னிக்கவும் */















































என்ன நண்பர்களே படிசிடீங்களா, புடிச்சிருந்தா அப்டியே உங்க ஓட்டை தமிலிஷ், தமிழ்மணம் மற்ற சின்னங்களிலும் குத்துங்க சாமி குத்துங்க.....!!!இதுவரை எல்லா பதிவுகளுக்கும் ஆதரவு கொடுத்து வரும் நண்பர்களுக்கு என் நெஞ்சார்ந்த நன்றிகள்.......!Welcome to Valaimanai Tamil Blog by Sukumar Swaminathan. Full of fun comments on IPL Cricket stills, Tamil cinema cricket stills, ICC world T20 cricket stills Fun comments, Twenty20 fun comments by Valaimanai blogspot.Tags : kolkataa knight riders, chennai super kings, delhi daredevils, rajasthan royals, kings xi punjab, bangalore royal challengers, dhonis men, india, netherland, srilanka, scotland, england, southafrica, pakistan, australia, newzealand, westindies, bangladesh, twenty twenty world cup, 20 20 world cup in england cricket grounds, tickets, booking



Tuesday, June 16, 2009

ஐ.பி.எல் போட்டிக்கும் ஐ.சி.சி. போட்டிக்கும் ஆறு வித்யாசங்கள்

/*இந்த பதிவு முழுக்க முழுக்க கற்பனையே... யார் மனதையும் புண்படுத்தும் நோக்கத்தோடு எழுதப்பட்டது அல்ல.. யாரேனும் புண்பட்டால் தயவு செய்து மன்னிக்கவும் */

















என்ன நண்பர்களே படிசிடீங்களா, புடிச்சிருந்தா அப்டியே உங்க ஓட்டை தமிலிஷ், தமிழ்மணம் மற்ற சின்னங்களிலும் குத்துங்க சாமி குத்துங்க.....!!!இதுவரை எல்லா பதிவுகளுக்கும் ஆதரவு கொடுத்து வரும் நண்பர்களுக்கு என் நெஞ்சார்ந்த நன்றிகள்.......!

Saturday, June 13, 2009

ஹிஸ்டரி ரிபீட் ஆகுமா ? - வலைமனை கற்பனை கலாட்டா

























என்ன நண்பர்களே படிசிடீங்களா, புடிச்சிருந்தா அப்டியே உங்க ஓட்டை தமிலிஷ், தமிழ்மணம் மற்ற சின்னங்களிலும் குத்துங்க சாமி குத்துங்க.....!!!இதுவரை எல்லா பதிவுகளுக்கும் ஆதரவு கொடுத்து வரும் நண்பர்களுக்கு என் நெஞ்சார்ந்த நன்றிகள்.......!

Thursday, June 11, 2009

நடப்பு சாம்பியனை வெளி நடப்பு சாம்பியன் ஆக்கிடாங்களே...!!






























என்ன நண்பர்களே படிசிடீங்களா, புடிச்சிருந்தா அப்டியே உங்க ஓட்டை தமிலிஷ், தமிழ்மணம் மற்ற சின்னங்களிலும் குத்துங்க சாமி குத்துங்க.....!!!
இதுவரை எல்லா பதிவுகளுக்கும் ஆதரவு கொடுத்து வரும் நண்பர்களுக்கு என் நெஞ்சார்ந்த நன்றிகள்.......!