100 வது பதிவு (இது என் தப்பு. இவ்ளோ கொடுமைக்கும் மன்னிச்சுடுங்க. ).
ஒரு லட்சம் ஹிட்ஸ் (இது உங்க தப்பு ஹி.. ஹி....).
160+ பாலோயர்ஸ் ( ஒரு வேலை தப்பா வழி மாறி வந்திருப்பாங்களோ..?.)
ச்சே.. எல்லாம் தப்பு தப்பா வருது. சரி இப்போ சரியா சொல்றேன் நோட் பண்ணிகோங்க.
நூறு என்பதும் ஒரு எண்ணிக்கையே என்றாலும் மற்ற பதிவுகளை போல இதுவும் ஒரு பதிவே என்றாலும் இங்கே கொஞ்சம் நின்று எல்லோருக்கும் நன்றி சொல்லும் வாய்ப்பாக இதை நான் எடுத்து கொள்கிறேன். இதுவரை ஒட்டு போட்டும் பின்னூட்டங்கள் கொடுத்தும் உற்சாகப்படுத்தும் அனைத்து சகோதர சகோதரிகளுக்கும், பதிவுகள் பலரை சென்றடைய வழிவகுக்கும் தமிழிஷ், தமிழ்மணம், திரட்டி குழுமத்தாருக்கும், பின் தொடரும் நல் உள்ளங்களுக்கும் ட்விட்டர், பேஸ்புக் முதலியவற்றில் இணைப்புகள் கொடுக்கும் முகம் தெரியா இணைய நண்பர்களுக்கும், தொடர்ந்து ஆதரித்தும் ஆலோசனைகள் வழங்கியும் பக்க பலமாய் இருக்கும் சக பதிவர்களுக்கும் எனது நெஞ்சார்ந்த நன்றிகள் !!!
தொடர்ந்து வாருங்கள். நிறை குறைகளை கூறுங்கள்.
ஐ.பி.எல் மேட்ச் பரபரப்பாய் நடந்து கொண்டிருந்த சமயம். திடீரென ஒரு நாள் கேபிள்ஜி போன் செய்தார். மேலே உள்ள கமெண்டை அப்படியே சொல்லி "யோவ் இது உன் பதிவில் போட்டதுதான, இங்க ஒரு டீ கடையில நிக்கறேன், எந்த சேனல் தெரியல, ஒரு எப்.எம் ரேடியோவில இந்த கமெண்டை அப்படியே சொல்லி இப்படி இன்டர்நெட்டில் கிண்டல் பண்றாங்கன்னு சொல்றாங்கய்யா" என்றார். கேட்கவே மகிழ்ச்சியாய் இருந்தது. வலைமனையை அறிந்த சில நண்பர்களும் அடிக்கடி இந்த படங்கள் இ-மெயிலில் பார்வர்ட் ஆகி வருவதாக சொல்கிறார்கள். என்ன சொல்வதென்றே தெரியவில்லை. நாலு பேரை சிரிக்க வைக்கும் ஆனந்தம் இருக்கிறதே அடடா.. அதன் சுகமே தனி. அதே சமயம் யாரையும் குறி வைத்து தாக்காமல், முடிந்த அளவு சம்பந்தபட்டவர் படித்தாலும் மனம் புண்படக்கூடாது என்கிற அளவுகோளை வைத்து கொண்டு கமெண்ட் போடுகிறேன். ஒரு சாமானியனாக வாழும் போது நம்மை சுற்றி நடக்கும் நிகழ்வுகளில் சில நமக்கு டென்ஷன் கொடுக்கும், சில சிரிப்பை கொடுக்கும், இவ்வாறான விஷயங்களை எடுத்து ஜாலியாக கிண்டல் செய்து விட்டு போய் கொண்டிருக்கிறேன். இதில் தெரிந்தோ தெரியாமலோ யார் மனதையும் புண்படுத்தி இருந்தால் மன்னிச்சுடுங்க..
அப்புறம் இன்னொரு விஷயத்துக்கும் மன்னிச்சுடுங்க.
அது 2016, 2021 எதுவாக வேண்டுமானாலும் இருக்கலாம். அப்பொழுது தொடங்க போவதாக இருக்கும் விஜய்யின் கட்சிக்கு இப்பொழுதே ஒலிக்கும் " தமிழன் வீர தமிழன் தலைமை தாங்கும் ஒருவன்" என்கிற லேட்டஸ்ட் பிரசார பாடலை ஒரு எங்கு கேட்டாலும் டென்ஷன் ஆகிறது. நீங்க கேக்கலைனா எனக்கு ஒண்ணும் இல்லை.. என்னிடம் இவ்வாறான விஷயங்களை விரும்பும் என் ரசிகர்களுக்காக இதை நான் செய்தே தான் தீருவேன் என்பது தான் இது போன்ற குற்றச்சாட்டுகளுக்கு இன்று விஜய்யின் பதிலாக இருக்கிறது.
அண்ணா உங்ககிட்ட ஒண்ணே ஒண்ணு கேக்குறேண்ணா... சமீபத்துல ஒரு பேட்டியில், மக்களுக்கு ஒரு பிரச்சனைனா இறங்கி போரடுவேன்னு சொல்லி இருக்கீங்க.. இப்போ எங்களுக்கு உங்க படங்கள் ஒரே விதத்தில் வருவதும், நிமிடத்திற்கு ஒருமுறை உங்கள் படம் சூப்பர் ஹிட் என விளம்பரம் வருவதும் பெரும் பிரச்சனையாக இருக்குதுன்னு சொல்றோம். முதல்ல இதுக்கு என்னை பண்ண போறீங்க... உங்களுக்கு பிடிக்கலைனா பார்க்காதீங்க... என் ரசிகர்களுக்காக நான் இப்படிதான் நடிப்பேன்னு எல்லாம் சொல்ல கூடாது. அப்போ நாளைக்கே நீங்க முதல்வர் ஆனா ( ஒரு பேச்சுக்கு சொல்றேன்) உங்களுக்கு ஒட்டு போட்டவங்களுக்கு மட்டும் சலுகைகள் கொடுத்திட்டு வேறு கட்சிக்கு ஒட்டு போட்டவர்களை அம்போவென விட்டுடுவீ ங்களா?
சரி என்னமோ போங்க. அடுக்கடுக்காய் இப்போ எங்கு பார்த்தாலும் உங்களுக்கு கடிதம், அறிவுரை, இ-மெயில்னு இதே விஷயம் திரும்ப திரும்ப அதிக அளவில் சொல்லப்பட்டு வருது. ஆனா வழக்கம் போல இது எதையும் கண்டுக்காம "நான் வச்சதுதான் சட்டம்"னு நீங்க தொடர்ந்தீங்கன்னா.. சாரி பாஸ் நீங்க தமிழக முதல்வர் இல்ல.. அமெரிக்க ஜனாதிபதி ஆகுற மைண்ட் செட்ல இருக்கீங்கனு அர்த்தம்.
___
ஐ.சி.சி. போட்டியில் இந்தியா செமி பைனல்ஸ் போக முடியாதது ஒரு விதத்தில் நல்லதே என தோன்றுகிறது. இப்படி சொதப்பு சொதப்பு என சொதப்பும் டீம் தப்பி தவறி செமி பைனல்ஸ் போய் பாகிஸ்தானுடன் மோதி நாயடி பேயடி வாங்கி இருந்தால் அவ்வளவுதான். உலக கோப்பை போட்டிகளில் பாகிஸ்தான் இதுவரை இந்தியாவை வென்றதில்லை என இருக்கிற வறட்டு கவுரமும் புஸ் ஆகி இருக்கும். தோனி எது செஞ்சாலும் ஒரு அர்த்தம் இருக்கும்னு ரவி சாஸ்திரி ரெண்டு வாரத்துக்கு முன்னாடி சொன்னது நினைவிற்கு வந்தது ! வாழ்க தோனி ! வளர்க அவர் படை !
___
சத்யம் போய் இருந்தேன். How to Train your Dragon - 3D படம் பார்க்க. 1 மணிக்குதான் ஷோ போட்டிருந்தார்கள். 11 மணிக்கே போய்விட்டதால் என்ன செய்வதென பார்த்தேன். 11.15 க்கு சுறா படம். டிக்கெட் வாங்கி விடலாமா என ஒரு நிமிஷம் டெம்ப்ட் ஆனாலும் டக்கென அந்த தப்பான எண்ணத்தில் இருந்து சுதாரித்து கொண்டேன். மேலே Blur கேமிங் சோனில் ஐந்தாம் தளத்தில் எப்போதும் பிசியாக இருக்கும் Wii கேம்ஸ் அன்று காலியாக இருக்கவே ஆசை தீர விளையாடினேன். கையில் ஒரு ஒயர்லெஸ் ரிமோட் கொடுக்கிறார்கள். அதை நாம் பேட் போல பிடித்து கொண்டு விளையாட திரையில் சிக்ஸ், போர் என பால் பறக்கிறது. ஆஸ்திரேலியாவுக்கு எதிரான போட்டியில் இந்திய அணிக்காக ஐந்து ஓவரிலேயே 80 ரன்கள் எடுத்தேன். அப்புறம் 1 மணி ஆகி விடவே படம் பார்த்து விட்டு கிளம்பினேன்.
என்னது படம் பத்தி சொல்லவே இல்லையேனு கேக்குறீங்களா.. சிம்பிளா சொல்லனும்னா ஒரு ஊரு.. அதுக்கு ஒரு பிரச்சனை. அந்த பிரச்னையை நம்ம ஹீரோ எப்படி டீல் பண்ணி மக்களை காப்பாத்துறாரு.. இதான் கதை! சுறா கதை மாதிரியே இருக்குல்ல? என்னது மறுபடியும் முதல்லேயிருந்தானு நீங்க அலறுவது காதில விழுது. இதோட முடிச்சுக்குவோம்.
அமேசான் தளத்தில் இன்றைய ஆஃபர்களை காண
